අටමස් ගැබිණියකට පයින් ගසා කුසේ සිටි බිළිඳිය මරුට

ඉඩම් ආරවුලක් මත ඇති වූ වචන හුවමාරුවකින් පසු අසල්වැසි අයෙකු විසින් අට මස් ගැබිනි මවකට එල්ල කළ බව කියන පහරකින් ඇගේ කුස තුළ සිටි බිළිඳිය මිය යාමේ සිද්ධියක් පිළිබඳව දකුණු කළුතර ‍පොලීසිය පරීක්ෂණ ආරම්භ කොට ඇත.

මෙසේ මිය ගොස් ඇත්තේ කළුතර කලමුල්‍ලේ පදිංචි දැලකඳුර ආරච්චිගේ දිනුෂා ශාමිකා සිල්වා ගුණරත්න (අවු.33) යන අයගේ කුස තුළ සිටි දැරියයි.

මෙම පහරදීමෙන් පසු අසාධ්‍ය තත්ත්වයකින් කළුතර මහ රෝහලට ඇතුළත් කර තිබූ ගැබිනි මවගේ කුස තුළ සිටි දැරිය ශල්‍යකර්මයකින් පිටතට ගන්නා අවස්ථාව වන විට මියගොස් සිටි බව ‍පොලීසිය අධිකරණයට වාර්තා කොට තිබුණි.

මෙම දරුවා බිහිවීමට නියමිතව සිටියේ ඔක්තෝබර් මස 30 වන දිනය.