අන්තර්ජාලයෙන් අරක්කු විකුණූ ‘කප්රුක’ මාට්ටුයි

අන්තර්ජාලය ඔස්සේ ලබාගන්නා ඇණවුම් වලට ශ‍්‍රී ලංකාවේ විවිධ ප‍්‍රදේශවලට මත්පැන් බෙදාහැරිය මහාපරිමාණයේ ජාවාරමක් වැටලීමට සුරාබදු විශේෂ මෙහෙයුම් ඒකකය ඊයේ (20) සමත් වී ඇත. මෙවැනි වැටලීමක් ශ‍්‍රී ලංකාව තුළ සිදුකළ පළමු අවස්ථාව මෙය වන බව සුරාබදු දෙපාර්තමේන්තුව පැවසීය.

‘කප්රුක’ නමැති පෞද්ගලික ව්‍යාපාරික ආයතනය, වෙබ් අඩවියක් පවත්වාගෙන යමින් විවිධ භාණ්ඩ බෙදාහැරීම සිදුකරන මුවාවෙන් මෙම මත්පැන් බෙදාහැරීමේ ජාවාරම සිදුකර තිබේ. අන්තර්ජාලය හරහා මත්පැන් ඇණවුම් කරනු ලබන පුද්ගලයන්ට අදාළ ස්ථානයටම එම මත්පැන් සපයා දීම මෙම ව්‍යාපාරික ආයතනයේ සේවකයන් විසින් සිදුකර ඇති බවත් ගැනුම්කරුවන්ට ණය කාඩ්පත් මගින්ද ගෙවීම් සිදුකිරීමේ පහසුව සලසා දී ඇති බවත් මූලික විමර්ශනවලදී අනාවරණ වී ඇත.

කොළඹ සුරාබදු විශේෂ මෙහෙයුම් ඒකකය උපාය දුතයෙකු යොදවා සිද්ධියට සම්බන්ධ සැකකරුවෙකු අත්අඩංගුවට ගෙන ඇති අතර ඔහුගෙන් සිදුකළ ප‍්‍රශ්න කිරීම් අනතුරුව මෙම ව්‍යාපාරික ආයතනයේ හිමිකරු ද සුරාබදු නිලධාරීන් විසින් අත්අඩංගුවට ගෙන ඇත.

මෙම මත්පැන් බෙදාහැරීමේ අන්තර්ජාල වෙබ් අඩවිය පවත්වාගෙන ගොස් ඇත්තේ දුලින් හේරත් නමැති අයකු විසින් බවත් ඔහු බෞද්ධ ශාසන අමාත්‍යංශයේ හිටපු ලේකම් කැනිෂියස් හේරත් මහතාගේ පුත්‍රයෙකු බවත් අනාවරණය වී ඇත. එසේම දුලින් හේරත් මහතාගේ මව වන නිලංගනී හේරත් මහත්මිය ශ්‍රී ලංකාවේ ප්‍රධාන ෆෙන්ශුයි ක්‍රියාකාරීනියෙකි.

‘කප්රුක’ ආයතනයට අයත් කිරුළපන විජය කුමාරතුංග මාවතේ පිහිටි ගබඩාවක තිබී රුපියල් මිලියනයකට අධික මත්පැන් තොගයක් ද සුරාබදු නිලධාරීන් භාරයට ගෙන ඇත. එමෙන්ම මෙම ව්‍යාපාරික ආයතනයේ ශාඛාවන් අමෙරිකාව, එංගලන්තය සහ ඔස්ටේ‍්‍රලියාව යන රටවල ද පවත්වාගෙන ගොස් ඇති බවත් වසර 8ක පමණ කාලයක සිට මෙම ජාවාරම කරගෙන ගොස් ඇති බවත් විමර්ශනවලදී අනාවරණය වී ඇත.

මත්පැන් ගබඩා කිරීම මෙන්ම බෙදාහැරිම සඳහා ‘කප්රුක’ ආයතනය සුරාබදු දෙපාර්තමේන්තුවෙන් බලපත්‍රයක් ලබාගෙන නොමැති අතර ‘කප්රුක’ ජංගම සාප්පු සංකීර්ණ වෙබ් අඩවිය එහි සේවාවන් සඳහා කිහිපවරක්ම සම්මාන දිනු වෙබ් අඩවියකි.

Check Also

සිව්වැනි දිනය වැස්සට සේදෙයි

තුන්වැනි දින පස්වරුවේ ආරම්භ වූ වර්ෂාව දිගින් දිගටම පැවතීම නිසා කොළඹ පී. සරවනමුත්තු ඕවල් පිටියේදී ...

“නයිට් ක්ලබ්” හිමිකරුගේ ඝාතනයේ පරීක්ෂණ ඇරඹේ

( අතුල බණ්ඩාර ) 2015-10-25 අනුරාධපුර පොලිස් වසමේ මුදිතා මාවතේ පිහිටි රාතී‍්‍ර සමාජ ශාලාවේ හිමිකරුගේ ...