Ceylon Radio
කුමාර් සංගක්කාර ගැනප්‍රවීණ ක්‍රිකට් විස්තර විචාරකයින්දක්වන අදහස්
කුමාර් වෝක්ෂනාද සංගක්කාර එහෙමත් නැත්නම් යාළු මිත්‍රයො කියන විදිහට සංගා කියන්නේ ශ්‍රී ලංකාවේ ක්‍රිකට් ක්‍රීඩාවේ සුවිශේෂී අනන්‍යතාවයක්. එහෙමත් නැත්නම් සුවිශේෂී සලකුණක්. සංගා තුළ මුසුව ඇති ගුණාංග මේ ලෝකෙ කිසිම ක්‍රිකට් ක්‍රීඩකයකු තුළ මුසුවී නැති බව බොහෝදෙනෙක් පවසන දෙයක්. මේ සුපිරි ක්‍රිකට් ක්‍රීඩකයාගේ අපූරු ගුණාංග පිළිබඳව ක්‍රිකට් විස්තර විචාරකයින් කීපදෙනෙක් සමග කතා කරන්න අපි හිතුවා. ඒ අනුව සංගා ගැන මුලින්ම අපට තොරතුරු කියන්න එක් වුණේ ප්‍රවීණ ඉංග්‍රීසි ක්‍රිකට් විස්තර විචාරක රංජිත් ප්‍රනාන්දුයි.
“මට මතකයි සංගක්කාර මුලින්ම එන්.සී.සී. ක්‍රීඩා සමාජයට බැඳුනු කාලෙ. එතකොට ඔහු සාමාන්‍ය මට්ටමේ ක්‍රීඩකයෙක්. කොහොම හරි ඔහු අපේ ක්‍රීඩා සමාජයට බැඳෙන එක ගැන අප තුළ තිබුණෙ ලොකු කැමැත්තක්. මොකද ක්‍රීඩකයෙකු හැටියට විතරක් නමෛයි, ත්‍රිත්ව විද්‍යාලයෙන් එන ක්‍රීඩකයෙක් වීමත් ඊට හේතුවක් වුණා. ඊට කළින් හිටිය නිමල් මාරලන්ද, රවී රත්නායක වැනි ත්‍රිත්ව විද්‍යාලයෙන් ආ ක්‍රීඩකයින් ඉතා හොඳින් ක්‍රීඩා සමාජය තුළ සාමාජිකත්වය දැරුවා.”
රංජිත් සංගා පිළිබඳ අතීතය මතක් කරන්න පටන් ගත්තෙ එහෙමයි.
කොතරම් හොඳින් ක්‍රීඩා කළත් ඒ මුල් කාලෙ සංගාට ජාතික කණ්ඩායමට ඇතුළත්වෙන්න අවස්ථාවක් තිබුණෙ නැතිලු. මොකද ජාතික කණ්ඩායමේ විතරක් නමෛයි. එන්.සී.සී. ක්‍රීඩා සමාජයෙත් ඒ වෙනකොට දක්ෂ ක්‍රීඩකයින් රැසක් ඉඳලා තියෙනවා.
“කොහොම හරි සිම්බාබ්වේ කණ්ඩායම ලංකාවට ආ වෙලාවක සංගක්කාර ඒ කණ්ඩායමට තේරුණා. මට මතක විදියට ඒ තරගයෙදී සංගක්කාර ලකුණු 160 ගණනක් රැස් කළා. ඒ තරගය බලන්න ඇවිත් හිටියා. එතකොට ශ්‍රී ලංකා කණ්ඩායමේ පුහුණුකරු වූ ඩේව් වට්මෝර්. එයා මගෙන් ඇහැව්වා “මේ මිනිහව මෙච්චර දවසක් හංගලා හිටියෙ කොහෙද?” කියලා. එහෙම තමයි එයාට ජාතික කණ්ඩායමට ඇතුළු වෙන්න මග පෑදුනේ. එදා ඉඳලා මේ Kumar-Sangakkara2දක්වාම ක්‍රම ක්‍රමයෙන් සංගක්කාර දියුණු වුණා. ලොකුම දෙය තමයි එයා තුළ තියෙන උනන්දුව.”
රංජිත් කියනවා.
සංගක්කාර ඉගෙනීමටත් දක්ෂයෙක්. අර මුල් දවස්වල කණ්ඩායමේ අවස්ථාවක් ලැබෙන්නෙ නැති වුණාම වෙන කෙනෙක් නම් ක්‍රිකට් දමලා ගහලා ගිහිල්ලා පොත පතේ වැඩකරන්නත් ඉඩ තිබුණලු.
“ඒත් සංගක්කාර ඒ හැම දෙයක්ම දරාගෙන බොහොම ඉවසීමෙන් තම ගමන ගියා. ඒ වගේම තමන්ගෙ ක්‍රීඩා සමාජයට තිබුණු බැඳීම අඩු කළෙත් නැහැ. ඒ ප්‍රතිඵල තමයි අද අපි සංගක්කාර තුළින් දකින්නෙ.” ඔහු වැඩිදුරටත් සඳහන් කළා.
සංගා ගැන ඊළඟට අපට තොරතුරු කිව්වෙ ඉංග්‍රීසි බසින් ක්‍රිකට් විස්තර විචාරයේ යෙදෙන තවත් ප්‍රවීණයෙකු වන රොෂාන් අබේසිංහයි.
“සාමාන්‍යයෙන් ක්‍රිකට් ක්‍රීඩාවේදී පිතිකරුවකු වයසටයත්ම ඔහුගෙ ඉරියව්වල ජවය අඩුවෙනවා. ඒත් සංගක්කාර ලකුණු ලබාගන්න විදිහ දැක්කම ඔහුට වයස කිසිම ප්‍රශ්නයක් නෙවෙයි කියලා මට හිතෙනවා.”
රොෂාන් සංගක්කාරව දකින්නෙ එහෙමයි
“ඒ වගේම මුළු ලෝකයම මහත්මයෙකු හැටියට පිළිගන්න ක්‍රීඩකයෙක් තමයි සංගක්කාර කියන්නේ ඒ නිසා තමයි ඔහුව එම්.සී.සී. දේශනය පැවැත්වීම සඳහාත් තෝරගත්තේ. ඒ දේශනයට තෝරගන්නේ සුවිශේෂී පුද්ගලයින්වයි. සංගක්කාරට පස්සෙ ඒකට තෝරගත්තෙ ටෝනි ග්‍රේග්වයි.”
ඔහු වැඩිදුරටත් පවසනවා.
ප්‍රවීණ ක්‍රිකට් විස්තර විචාරක කමල් දේශප්‍රිය සංගක්කාරව දකින්නෙ ලොව අංක 3 පිතිකරුවන් අතරින් විශිෂ්ටතම පිතිකරුවා හැටියටයි. විශේෂයෙන්ම එක්දින තරගවලදී නියම විදිහට මැනලා බලලා ක්‍රීඩාකරන පිතිකරුවෙක් හැටියටත් කමල් සංගක්කාරව හඳුන්වනවා.
“ඒ වගේම පිට්ටනියෙදි විතරක් නෙවෙයි ඉන් පිටතදිත් නියම විදිහට ඔලුව පාවිච්චි කරන්න පුළුවන් ක්‍රීඩකයෙක් තමයි සංගක්කාර කියන්නේ. ඔහුට තිබෙන සන්නිවේදන හැකියාවත් ඉතා ඉහළයි. ඉංග්‍රීසි වගේම සිංහලත් එක විදිහටම හසුරවන්න ඔහුට තියෙන්නේ අපූරු හැකියාවක්. එම්.සී.සී. දේශනය සඳහා ලංකාවෙන් අවස්ථාව ලද එකම ක්‍රීඩකයා ඔහුයි. ඒකෙන්ම පෙනෙනවා ඔහුට අන්තර්ජාතික මට්ටමෙන් තියෙන පිළිගැනීම. සංගක්කාර සාමාන්‍ය ජිවිතයේදිත් ඉතා නිහතමානි ක්‍රීඩකයෙක්. සමහර ක්‍රීඩකයො පිස්සු නටනකොට පිස්සු නටන්න පුළුවන් ක්‍රීඩකයො මහත්වරු විදිහට හැසිරෙනවා කියන එකට හොඳම උදාහරණය තමයි සංගක්කාර.”
අවසන් වශයෙන් අපට සංගා ගැන තොරතුරු කිව්වේ තවත් ප්‍රවීණ ක්‍රිකට් විස්තර විචාරකයෙකු වන කැළුම් ශ්‍රීමාල්.
“මං හිතන විදිහට කුමාර්ව මුලින්ම ටී.වී. එකේ වැඩසටහනකින් පෙන්නුවේ මමයි. ඒ ඔහු ශ්‍රී ලංකා ‘ඒ’ කණ්ඩායමට ක්‍රීඩා කරන කාලෙ. මං ඒ දවස්වල සිරසෙ ‘කඩුල්ල’ ක්‍රිකට් වැඩසටහන කරනවා. දවසක් එන්.සී.සී. එකට ගියා අපේ වැඩසටහන රූගත කරන්න මාත් එක්ක. ‘ක්‍රිකට් ෂෝ’ ඉංග්‍රීසි වැඩසටහන කරන්න බ්‍රයන් තෝමසුත් ඇවිත් හිටියා. කොහොම හරි මගෙ වැඩසටහනට එන්නං කියපු ක්‍රීඩකයා එදා ආවේ නෑ. ඒ වෙලාවෙ යන්තම් දැලි රැවුල තියෙන පුංචි හාදයෙක් බොහොම අපූරුවට පන්දුවට පහර දෙන හැටි බලලා මට හිතුණා එයාව වැඩසටහනට ගන්න. ඒ තමයි කුමාර්. මං ළඟට ගිහින් විස්තරේ කියල ඇහැව්වා වැඩසටහනට එකතුවෙන්න කැමතිද කියලා. එයා මගෙන් ඇහැව්වා ‘මං හරියයිද අයියෙ ඔය වැඩේට’ කියල. කොහොම හරි කුමාර් වැඩේට සහභාගි වුණා. එක ඉංග්‍රීසි වචනයක්වත් කතා කරන්නෙ නැතුව බොහොම චතුර විදිහට සිංහලෙන් කතා කළ හැටි මට අද වගේ මතකයි.”
කැලුම් කිව්වා.
කොහොම හරි ඒ වෙලාවේ ‘ක්‍රිකට් ෂෝ’ එක කරන්න ඇවිත් හිටිය බ්‍රයන් තෝමස්ටත් එනවා කියපු ක්‍රීඩකයා කණුව තියලා. ඒ පාර කැලුම් බ්‍රයන්ට කිව්වලු ඒකටත් කුමාර්ව ගමු කියලා.
“මචං එයාගෙ ඉංග්‍රීසි කොහොමද දන්නෙ නැහැ නේද?”
බ්‍රයන් ඒ වෙලාවෙ එහෙම කිව්වලු. පස්සෙ කැලුම් විස්තරේ කියලා සංගාගෙන් ඇහැව්වලු ඉංග්‍රීසි වැඩසටහනටත් සහභාගිවෙන්න පුළුවන්ද කියල.
“නෝ ප්‍රොබ්ලම්… ඔයාලට ප්‍රශ්නයක් නැත්නම් මටත් ප්‍රශ්නයක් නෑ” කියලා. සංගා වැඩේට බැස්සලු. කොහොම හරි බ්‍රයන් ප්‍රශ්නයක් දෙකක් අහද්දි ආයෙත් බ්‍රයන්ට අහන්න දෙයක් නැති තරමට සංගා නම් අපූරුවට ප්‍රශ්නවලට උත්තර දීලා තියෙනවා.
“මං කුමාර්ව හඳුන්වන්න කැමති වර්තමාන ශ්‍රී ලංකා ක්‍රිකට් ක්‍රීඩාවේ අනන්‍යතාවය විදිහටයි. නිහතමානීකම, උගත්කම, දක්ෂකම කියන හැමදේම සංකලනය වූ ක්‍රීඩකයෙක්. ලංකාවේ විතරක් නමෛයි මං මුළු ලෝකයේම දැකලා නැහැ. කුමාර් කියන්නෙ අපට ලොකු සම්පතක්.”
කැලුම් කියනවා.
ක්‍රිකට් සෙල්ලම් කරන්න විතරක් නමෛයි, රඟපෑමටත් කුමාර් තුළ අපූරු දක්ෂතාවයක් තියෙන බව කැලුම් කියනවා. ක්‍රිකට් ක්‍රීඩාවට නොආවා නම් සමහරවිට රඟපෑමට යොමුවෙන්න ඉඩ තිබ්බා යැයි කුමාර් වතාවක් කැලුම්ට කියලා තියෙනවලු. ඔහු පෙනී සිටින වෙළෙඳ දැන්වීම්වල ඔහුගෙ මුහුණෙ හැඟීම් ප්‍රකාශ කිරීම් තුළ දක්ෂ නළුවෙකුගෙ පෙර නිමිති ඇති බව ඔහු පවසනවා.
“කුමාර් හොඳ රසඥතාවයක් ඇති සංගීත රසිකයෙක්. වතාවක් කොළඹ සරසවියෙ පැවැත්වූ අමරදේවයන්ගේ සංගීත ප්‍රසංගයක් බලන්න ඕනෙ කියලා මට කිව්වා. ඒ ප්‍රසංගයෙ නිවේදන කටයුතු කළේ මමයි. මං සංවිධායකයින්ට ඒ බව කිව්වම ටිකට් 5ක්ම දුන්නා. ඒ ප්‍රසංගයට ආරාධිතයෙක් හිටියෙ නැහැ. අන්තිමට ඒකෙ ප්‍රධාන ආරාධිතයා වුණේ කුමාර්.”
කැලුම් වැඩිදුරටත් පවසනවා.
ගැමුණු රත්නායක
Lakbima
