පුනර්භවය

හින්දු හා බෞද්ධ ජනතාව, පුනර්භවය විශ්වාස කරන ප්‍රධාන කොට්ටාශ දෙකකි. මෙම පුනර්භවය සඳහා පංචේන්ද්‍රයන්ට දැනෙන සාධකද තිබෙන බව මොවුන් පවසයි. ඒවා නම්, කුඩා දරුවන් ඔවුන්ගේ පෙර භවයන් ගැන ප්‍රකාශ කිරීමයි. එනම්, පෙර භවයේ සිටි ස්ථානය, කල දේවල්, මිය ගිය ආකාරය යනාදිය මොවුන් පවසයි. මේ සම්බන්ධ ලිපි ගැන ගවේශණයේදී ගැටළු කිහිපයක් මතුවිය.

මේ සම්බන්දයෙන් ලියැවුනු ලිපිවල බොහෝමයක් දුරට (මා කියවන ලද ලිපිවලින් නම් 100%) නැවත් ඉපදී ඇත්තේ අනතුරුවලින් මිය ගිය අය වේ. සාමාන්‍ය මරණයන් නැවත නොඉපදේන්නේද? නැත්නම් එම දරුවන් පෙර භවය ආවර්ජනය නොකරන්නේද?

නැවත ඉපදී ඇත්තේ 99% ක්ම පෙරභවයේදීද මිනිසුන්ව සිටි අයයි(පෙරභවය ආවර්ජනය කල අයට අනුව). නමුදු ලොව ජනග්‍රහණය දිනෙන් දින ඉහල යමින් පවතී. මෙය සාධාරණීය කල හැක්කේ කෙසේද?

වෙනත් ලෝකවල් වල සිටින ජීවීන් හෝ වෙනත් ආකාරයක්ව (උදා.ප්‍රේත) සිටි අය නැවත ඉපදී, පෙරභවය ආවර්ජනය කල අවස්ථාවක් කොහෙත්ම නැත.

තවද මෙම පුනර්භව කතා තුලින් ආත්මීය ලක්ෂණ පෙන්නුම් කරයි.

බුදු දහම අනාත්මීය දර්ශණයකි. කෙසේ මම නැත්තේද එලෙසම ආත්මයක්ද නැත. ඇත්තේ වේගයෙන් ක්‍රියාත්මක වන සිතුවිලි පරම්පරාවකි. මිය යන අවස්තාවේ චුති සිත ප්‍රතිසන්ධි වීමක් බුදු දහමට අනුව පුනර්භවයේදී සිදුවේ. (මේ සම්බන්දයෙන් කතා කිරී‍ම මෙම ලිපියේ අරමුණ නොවේ.) නමුත්, මෙම පුනර්භව ආවර්ජනය කල අය කියූ සිද්ධින්ට අනුව, සමහර අය නැවත ඉපදී ඇත්තේ අවුරුදු කිහිපයකටත් පසුවය. ආත්මයක් නොමැති නම්, මැරුණු මොහොතේ සිට නැවත ඉපදීම දක්වා කාලය තුල සිදුවූයේ කුමක්ද? මෙය ආත්මීය ලක්ෂණයකි. (නමුත් හින්දූන් ආත්මීය පුනරුත්පත්තිය විශ්වාස කරයි)

එසේ නම් මේ ගැන පැවසිය හැක්කේ කුමක්ද? අනාත්මීයයි යන්න වැරදී කියාද? නැතිනම් මෙම දරුවන් කියන්නේ බොරුයි කියාද?

සත්‍ය ලෙස සිදුවන්නේ කුමක්ද?

ඉස්ලාමයට අනුව, මිනිසාට අමතරව අල්ලාහ් පිරිසිඳු ගින්දරින් ජින්වරුන් ලෙස හැඳින්වෙන ජීවී කොට්ඨාශයක් මවා ඇත. ඉස්ලාමයේ සාතන් ලෙසින් හඳුන්වන යක්ෂයාද ගින්දරින් මවන ලද ජීවියෙකි. මෙම සාතන්ගේ කාර්ය වන්නේ මිනිසුන්හට වැරද්දක් කිරීම සඳහා අනුබල ලබාදීමය. ඔහුට විශේෂ හැකියාවන් නොමැත. ගුප්ත දේවල් දැන ගැනීමේ හැකියාවද නොමැත. ඔහු කරනු ලබන්නේ වැරද්දක් කිරීම සඳහා පොළඔවන ආකාරයට අප සිතට විධානයන් දීම පමණි. මෙම හේතුව නිසාම විනිශ්චය දිනයේදී මොහු, මිනිසුන්ට තමන් සිදුකලේ උපදෙස් දීම පමණක් බවත් නමුදු මිනිසුන්ට හොඳ නරක වටහා ගැනීමේ බුද්ධියක් අල්ලාහ් දී තිබුනු නිසා තමන්ගේ උපදෙස් පිළිපැදීම සම්බන්දයෙන් තමන් වරදකරු නොවන බවත් පවසා බේරීමට උත්සහ කරයි. තවද මෙම ජින්වරුන්ට මෙන්ම සාතන්ටද, තමන් සිතන ඔනෑම භෞතික ශරීර ස්වරූපයක් ගත හැක. නිවසේ සර්පයෙක් දුටුවිට පහර නොදී එලවා දමන ලෙසත් දින තුනක් තුල නැවත පැමිණයහොත් පමණක් පහර දෙන ලෙසත් ඉස්ලාමය පවසන්නේ එම සර්පයා ජින්වරයකු විය හැකි බැවිනි. (මොවුන්ට ඔනෑම හෞතික ශරීර ස්වරූපයක් ගත හැකි වුවද සමහර ජින්වරු සර්පයන් හා බල්ලන්ගේ ස්වරූපයෙන්ම සිටී) මොවුන් ගැන තරමක විස්තරයක් කරන ලද්දේ, මුස්ලිම් නොවන සහෝදරයින් මෙම ලිපිය කියවන විට අනවබෝධවීම වැලැක්වීමටය.

අපට මෙතනින් අවශ්‍ය වන්නේ සාතන්ගේ ක්‍රියා කලාපයයි. මා පෙර කිවූ පරිදි සාතන් අපගේ මනසට වැරදි උපදේශයන් දෙමින් අපත් සමගම සිටී. එක් එක් අයට එක් එක් සාතන්ලා සිටින අතර, ඔහුද අපත් සමග වැඩේ. ඔහුද අපේ අටුවා ටීකා සියල්ල දනී. නමුත් අප මිය යනවාත් සමග අප සාතන් මිය නොයයි. ඔහු සැරිසරමින් සිටී. තවත් විටෙක කුඩා දරුවන්ගේ කුඩා සාතන්ලව එළවා දමා එම තැන අයිති කරගනී. එවිට එම දරුවා එම මිය ගිය අයගේ සාතන් කියන දේවල් කියවයි.

මෙවැනි දේවල් ඔනෑම අයෙක් කුඩා කලදී සිදුවිය හැක. එය බාහිරයට පෙනීමට හෝ නොපෙනීමට පුළුවන. විශේෂයෙන්ම අනතුරු වලින් මියගිය අයගේ සාතන්ලා මෙවැනි දේවල් සඳහා යොමුවන්නේ කම්පනය නිසා විය හැක. කාලයාගේ ඇවෑමෙන් අදාල සාතන් වර්ධනය වූ පසු නැවතත් තමන්ගේ ස්ථානය ලබා ගනී.

මලවුන් ගෙන්වීම ද මේ හා සමාන දෙයකි. මෙයද පුනර්භව කතා සේම පංචේන්ද්‍රයන්ට දැනෙන සාධකයකි. මලවුන් ගෙන්වීමේදී මලවුන් අරූධ වන තැනැත්තා අදාල මල අයගේ කට හඩින්ම කතා කරයි. බුදු දහමට අනුව ආත්මයක් නොමැත. ඉස්ලාමයට අනුව මල අයගේ ආත්මයන් මෙහි රුඳී සිටීම හෝ සැරිසැරීම සිදු නොවේ. එසේ නම් මලවුන් ගෙන්වීමේදී මල අයගේ කටහඩින් කතා කරන්නේ කෙසේද? මලවුන් ලෙස ශරීරයට ආරූධ වන්නේ අදාල මල අයගේ සාතන්ය.