බුදුහාමුදුරුවො මුලින්ම දහම් දෙසුවේ අපේ ඇත්තන්ටයි – වන්නිල ඇත්තෝ

‘එක පැත්තකින් රජමහා විහාරය තව පැත්තකින් මහා බුදු පිළිමය අනෙක් පැත්තෙන් බුද්ධගයාව ඒ මැද මුස්ලිම් පල්ලියක් හදන එක සුදුසු නැහැ. ඒගොල්ලන්ගේ ඇදහිලි පගරගම්මනට ගිහින් කරගන්න. මේ තැන පිරිසිදුව තියෙන්න දෙන්න’ යැයි ආදිවාසී නායක ඌරුවරිගේ වන්නිලැ ඇත්තෝ පවසයි.

මහියංගණය නගර මධ්‍යයේ වෙළෙද සැලක් මැද පවත්වාගෙන යන බව කියන මුස්ලිම් පල්ලියක් සම්බන්ධයෙන් මෙසේ සිය අදහස් දැක්වූ ආදිවාසී නායකයා මෙසේද පැවසීය.

‘මහියංගනය කියන්නේ ලොකු ඉතිහාසයක් ඇති තැනක්. බුදුහාමුදුරුවො බුදුබවට පත්වෙලා මාස 09 කින් වැඩම කළේ මහියංගනයටයි. ඒ වඩිනකොට මහියංගණයේ ජීවත් වුණේ අපේ පරම්පරාවට අයත් යක්ෂ ගෝත‍්‍රිකයන්. ඒ කියන්නේ බුදුහාමුදුරුවො මුලින්ම දහම් දෙසුවේ අපේ ඇත්තන්ටයි.

මම නම් හිතන්නේ මේ රටේ ආගම් රාශියක් තියෙනවා. ජාති 23ක් ඉන්නවා. මේ හැම කෙනෙකුටම උරුම වෙච්චි ආගම් හා ඇදහිලි විධිවිදි තියෙනවා. හැම කෙනාටම අයිතියක් තිබෙනවා ඒ අයගේ ආගම අදහන්න.

හැබැයි මහියංගණයේ උරුම තැන තිබෙන්නේ වෙන කාටවත් නොවෙයි. අපේ ඇත්තන්ට. මුස්ලිම් අයට ඒ අයගේ පරම්පරාගත පල්ලියක් තියෙනව පගරගම්මන. අපි කුඩා අවධියේ ඉදලම දන්නවා. මුස්ලිම් ජනයා ඒ පල්ලියට ගිහින් තමයි ඇදහීම් කළේ. එසේ තිබියදී රජමහා විහාරය මහා බුදුපිළිමය හා බුද්ධගයාව ඒ මැද මුස්ලිම් පල්ලියක් හදන එක සුදුසු නැහැ’