ශ්‍රී ලංකා තේ ලෝක උරුමයක් වෙන්න යයි

ලෝක උරුමයක් ලෙස ශ්‍රී ලංකා තේ නම් කිරීමට සැලැසුම් කරන බව ජාතික උරුමයන් පිළිබඳ අමාත්‍යංශයේ අතිරේක ලේකම් සී.ජේ. සමරසිංහ මහතා පවසයි.

ඉංගී‍්‍රසි පාලන සමයේ බි‍්‍රතාන්‍ය ජාතික ජේම්ස් ටේලර් විසින් 1860 වසරේ ආරම්භ කළ මෙරට තේ වගාව ඉතා කෙටි කාලයකදී වාණිජ වගාවක් ලෙස ව්‍යාප්ත වූ අතර ලෝක වෙළෙඳ පොළේ අද වන විට ඇත්තේ ඉහළ පිළිගැනීමකි.

තේ වගාව සම්බන්ධයෙන් මෙරට විශේෂ සංස්කෘතියක් ද බිහිවී තිබීමද දැකගත හැකිය.

ඒ කරුණු සලකා තේ ලෝක උරුමයක් ලෙස නම් කිරීමට අදාළ යෝජනා මාලාව සැකැසෙමින් පවතින බවත් ඊට අමාත්‍ය මණ්ඩල අනුමැතිය ලබා ගැනීමෙන් පසුව යුනෙස්කෝ සංවිධානයේ ලෝක උරුම කමිටුව වෙත යොමු කරන බවත් අතිරේක ලේකම්වරයා පැවැසීය.