කොළඹ බොරැල්ල ප්‍රදේශයේ උසස් කාන්තා විද්‍යාලයක එකොළොස් වැනි වසර ඉගෙනුම ලබන සිසුවියක් පැහැරගෙන ගොස් මාස තුනක පමණ කාලයක් සඟවා ගෙන සිටි බවට සැක කරන තරුණයකු සහ කාන්තාවන් දෙදෙනකු අත්අඩංගුවට ගෙන ගල්කිස්ස අධිකරණයට ඉදිරිපත් කිරීමෙන් අනතුරුව අතිරේක මහෙස්ත්‍රාත් ප්‍රහර්ෂා රණසිංහ මහත්මිය විසින් සැකකරුවන් ලබන 24 වැනිදා දක්වා රක්ෂිත බන්ධනාගාර ගත කරනු ලැබුවාය.
බොරලැස්ගමුව සහ ගාල්ල ප්‍රදේශවල පදිංචි තිදෙනකු මෙසේ රක්ෂිත බන්ධනාගාර ගත කෙරිණි. දෙහිවල ප්‍රදේශයේ පදිංචි පාසල් දැරිය සැකකරු සමඟ ප්‍රේම සම්බන්ධයක් ඇති කරගෙන පසුව ඔහු විසින් ඇය පැහැරගෙන ගොස් මාස තුනක කාලයක් ගාල්ල සහ බොරලැස්ගමුව ප්‍රදේශවල රඳවාගෙන සිට ඇත.
මේ පිළිබඳ දැරියගේ මවුපියන් විසින් මිරිහාන පොලිසියට කරන ලද පැමිණිල්ලකට අනුව පරීක්ෂණ පවත්වා සැකකරු සහ දැරිය අත්අඩංගුවට ගෙන එයට අනුබල දුන් බවට සැකකරුගේ මව සහ නැන්දණිය අත්අඩංගුවට ගෙන තිබිණි.
දැරිය පරිවාස භාරයට පත් කළ අතර ඇය වෛද්‍ය පරීක්ෂණයකට යොමු කරන ලෙස විනිසුරුවරිය නියෝග කළාය.
mawbima
