Ceylon Radio
එක්සත් ජනතා නිදහස් සන්ධානයේ ප්‍රධාන හවුල් කාර පක්ෂය වන ශ්‍රී ලංකා නිදහස් පක්ෂය එම සන්ධානයෙන් ඉවත්ව මෙවර මහ මැතිවරණයට ඉදිරිපත් විය යුතු බවට රාජපක්ෂවාදීන්ට විරුද්ධ මතයක් දරණ ශ්‍රි ලනිප ජේෂ්ඨයන් පිරිසක් හිටපු ජනාධිපතිණිය සමඟ සාකච්ඡා කරමින් සිටින බව දැන ගැනීමට තිබේ.
මේ සම්බන්ධයෙන් කළ විමසීමකද චන්ද්‍රිකා බණ්ඩාරනායක මහත්මියගේ කාර්යාලයේ ප්‍රකාශකයකු පැවැසූවේ හොරුන්ගෙන් වංචාකාරයන්ගේන් ජාතිවාදීන් පිරී තිබෙන එජනිසෙන්, ශ්‍රී ලනීපය වෙන් කර එහි පිරිසිදු භාවය ආරක්ෂාකර ගත යුතු බවත් ජනතාවට ද්‍රොහී නොවන දේශපානයක් රැගෙන මෙවර මහ මැතිවරණයේදි ජනතාව හමුවට යාමට සිදුවනු ඇති බවත්ය.
රාජපක්ෂ මහතාට නාමයෝජනා ලබා දීම ගැන වූ සාකච්ඡාවලදී රාජපක්ෂ මහතාට නාම යෝජනා ලබාදීම සිදුවන්නේ ශ්‍රී ලනීපයෙන් නොව සන්ධානයේ වෙනත් පක්ෂයකින් බවටත් එකඟතාවයකට පැමිණ තිබෙන බවද දැනගන්නට තිබේ.
අප මීට පෙර පුවත් ගනනාවකදී හෙළි කළ පරිදී මහින්ද රාජපක්ෂ මහතා වෙනම තරග කිරීම අකුලා ගනු ලැබුවේ වෙනම තරග කර ජයගත නොහැකි බවට රාජපක්ෂ මහතා ස්තිර තීන්දුවක සිටි බැවිනි. එම නිසා කවර ක්‍රමයකින් හෝ සන්ධානයේ අපේක්ෂකත්වය ඔහු බලපොරොත්තු විය.
කෙසේ නමුත් ඊයේ හිටපු ජනාධිපතිවරයාට එජනිසෙන් නාම යෝජනා ලබා දීමට එකඟ වීම නිසා ශ්‍රී ලනීප නායකයන් හා පක්ෂෛකයන් රැසක් කළකිරීමෙන් පසුවන අතර ඉන් විශාල පිරිසක් මෙවර එජාපය හා එක් වන බවට මේවන විටත් ප්‍රකාශ කර තිබේ.
